Nagpasalig ang Department of Health nga ginahimo sang national government ang kutob sang masarangan agud gilayon nga matapna ang paglapta sang bag-o nga variants sang coronavirus nga ginapahayag mas makalalaton.
Ang bag-o nga variant nga ginatutukan sang health authorities amo ang variant halin sa South Africa nga ginpahayag may mutation nga nagaapekto sa pagkaepektibo sang bakuna.
Sang nagligad nga adlaw, gin-anunsyo sang gobyerno nga may 6 na ka kaso sang South African variant sa pungsod samtang ang UK variant naman ang nagsaka na sa 87 ka mga kaso.
Suno kay Health Undersecretary Maria Rosario Vergeire, ang duha ka nasambit nga variant ang lunsay may mas mataas nga transmissibility.
Sa South African variant, may component ukon mutation nga ginatawag immune escape nga amo ang nagapugong sa immune system sang lawas sang tawo nga mag-responde sa infection.
Sa Pasay City, 27 ka mga barangay ang naka-lockdown agud indi maglapta ang South African variant.
Ginpahayag man ni Vergeire nga dapat bakunahan ang barangay health workers agud maproteheran man sila batok sa virus.
Suno naman kay Health Secretary Francisco Duque III, nagapadayon pa subong ang imbestigasyon agud mahibaluan kun paano nakasulod sa Pilipinas ang bag-o nga variant kag ginatinguhaan man nga mapabilin nga manubo ang infection kag transmission rate.
