ILOILO CITY- Ginmando ni Justice Secretary Jesus Crispin Remulla nga iapelar sang Department of Justice (DOJ) ang desisyon nga ginpagwa sang korte batok sa anom ka mga anay police officers nga involved sa pagpatay sa 17-anyos nga si Jemboy Baltazar.
Si Baltazar ang napatay kadungan sang police operation sa Barangay North Bay Boulevard South Kaunlaran sang Agusto 2, 2023 bangud sa “mistaken identity.”
Suno kay Justice spokesperson Mico Clavano, gilayon nga nagtawag sa iya si Remulla matapos ang promulgasyon sa Navotas Regional Trial Court (RTC) Branch 286.
Pahayag ni Clavano, ginmando ni Remulla nga busision liwat ang mga facts sang kaso kag ang argumento nga gin-gamit sang judge kag lantawon kun ano ang pwede nga i-apelar.
Dugang ni Clavano, ang masunod nga tikang amo ang pagdangop sang decision sa Court of Appeals.
Nahibaluan nga sa desisyon sang korte, sa anom ka mga anay pulis, isa lang ang ginpamatbatan sang Navotas court nga guilty sang homicide samtang ang apat ang guilty sa illegal discharge of firearms.
Gin-acquit naman sang korte ang isa pa ka akusado.
Suno kay Clavano, apisar ginarespeto nila ang desisyon sang korte, nakit-an nila nga madamo nga argumento sa desisyon ang pwede maapelar kaangay sang conspiracy, intent to kill, ang pagka-rasonable sang lihok nga ginhimo sang pulis kag ang nangin reaksyon sang pulis sang nagapalagyo si Jemboy.
Una na nagpahayag sang pagkadismaya ang pamilya ni Baltazar sa desisyon sang korte.
