Ginahanda sang Department of Justice (DOJ) ang tuman ka bakod nga kaso nga posible magkumbinse sa gobyerno sang Cambodia nga ipa-deport na lang si suspended Negros Oriental 3rd District Rep. Arnolfo Teves Jr. agud makabalik sa Pilipinas.
Ginbuyagyag ini ni DOJ spokesperson kag Assistant Secretary Mico Clavano.
Suno kay Clavano, ang Cambodia (pungsod sa Southeast Asia kun sa diin reported man nga yara nagatinir si Teves) ang wala man sang extradition treaty sa Pilipinas.
“When you talk about extradition, it means there’s already an agreement between two states whereby the requesting state will request for the extradition of a certain suspect or a defendant and the requested state will have no choice but to extradite,” paathag sang spokesperson.
Suno pa sa DOJ spokesman, diskresyon sa gihapon sang Cambodia kun i-deport nila si Teves ukon indi; gani ang mahimo lamang sang Pilipinas amo nga bakuron ang kaso agud may bastante nga basehan nga ipakita sa Cambodia nga nagakabagay lamang nga ipa-deport ang amo nga tawo.
Sang ginpamangkot kun hungod ayhan nga ginpili ni Teves ang Cambodia bilang lugar nga panaguan bangud nakahibalo ini nga wala ini sang extradition treaty sa Pilipinas, ginpahayag ni Clavano nga posible ini apang wala gid sang ihibalo ang DOJ kun ano ang business interest sang suspended congressman sa amo nga pungsod.
