ILOILO CITY- Magapangapital ang Rehiyon 6 sa domestic tourism samtang limitado sa gihapon ang pagsulod sang mga turista gikan sa iban nga rehiyon kag lugar.
Sa interview sang Bombo Radyo kay Governor Arthur Defensor Jr, iya ginpahayag nga ini ang isa sa pinakaimportante nga topiko nga naistoryahan sa pagsinapol sang mga gobernador kag alkalde sa Western Visayas kahapon, Hunyo 10.
Suno kay Defensor, nasugilanunan ang tuhoy sa pagbukas sang border sa tanan nga probinsya sa Western Visayas bilang pamaagi agud mabalik kag mabuhi ang palangitan-an sang mga tawo kag mapahulag liwat ang ekonomiya.
Ginpahayag pa sang gobernador nga kadungan sang pagpahalog sa border restrictions, may kinamatarung sa gihapon ang kada probinsya sa pagpatuman sang ila quarantine procedures.
Magluwas diri, naistoryahan man ang tuhoy sa pagpahulag sang agrikultura.
May kaangtanan naman sa liwat nga pagbukas sang Iloilo International Airport kag byahe sang mga sea vessels, ginpahayag sang gobernador nga mga repatriated Locally Stranded Individuals kag Overseas Filipino Workers lang ang mahimo akomodaron paagi sa sweeper flights sang eroplano kag sang mga roll on- roll off(roro) vessels.
Samtang, positibo naman si Defensor nga hatagan sang konsiderasyon sang Department of Transportation Central Office ang gin-propose niya nga desinyo sang motorsiklo bilang kabahin sang hingyo nga pahanugutan ang pag-angkas sa mga motorsiklo sa probinsya sang Iloilo.
