Ginahitso na sang Department of Science and Technology ang ila mga plano kag preparasyon kasunod sang ginpatuman nga Enhanced Community Quarantine ni Presidente Rodrigo Duterte sa bilog nga Luzon bangud sa pagpamahog sang Coronavirus Disease 2019.
Suno kay Department of Science and Technology Sec. Fortunato de la Peña, kabulig man nila ang Philippine Council for Health Research and Development agud tsekyaron nga mapatuman ang mga kinahanglan nga serbisyo.
Lakip diri ang test kits nga gina develop sang UP National Health Institute kag partner offices; applicatiuon nga ginadevelop sang researchers nagikan sa Ateneo de Manila University nga maka predict sa duration sang COVID-19 outbreak kag ang pagpanalawsaw sa virgin coconut oil bilang posible nga gamot sa nasambit nga balatian.
Dugang sang natungdan, nakig-angot na ang Philippine Textile Research Institute sa local government sang Rizal kag pribado nga sektor para sa produksyon sang 500,000 ka reusable face masks.
Suno naman sa Philippine Institute of Volcanology and Seismology, handa man ang ila nga talatapan nga maghatag sang mga wala nagamit nga face masks nga gindonar sang naglupok ang bulkang Taal.
Buksan man sang Industrial Technology Development Institute ang ila nga Food Innovation Facilities para sa produksyon sang processed food kaangay sang 15,000 packs sang Ready to Eat Arrozcaldo Chicken kag 3,000 nga kan-on para sa mga rehiyon.
Target man sang Food and Nutrition Research Institute nga maghatag sang complimentary food sa mga kabataan.
Magluwas sa mga nasambit nga ahensya, pila ka talatapan sa idalom sang DOST ang nagpasalig man nga magapalab-ot sang bulig sa bilog nga rehiyon.
