ILOILO CITY- Hugot nga pabantayan sang Brgy. Council sang Tacas, Jaro, Iloilo ang area nga ginluntaran sang pagbungguanay sang motorsiklo kag 10-wheeler truck kun sa diin isa ang patay bangud ginapahayag nga may ginapatigayon nga drag-racing sa lugar.
Sa interview sang Bombo Radyo kay Punong Brgy. Joseph Poral, iya ginpahayag nga sadto, masami gid man ginapatigayunan sang drag-racing ang amo nga area bangud malapad ini.
Apang, suno kay Poral, wala man sila sang may naaktuhan nga nagapartisipar sa karera sang mga motorsiklo.
Pahayag niya, bangud sang insidente kagab-i, maga-assign sila sang tanod sa lugar agud magbantay kag magsaway sa mga grupo nga nagapatigayon sang amo nga aktibidad.
Nahibaluan nga patay ang driver sang motorsiklo nga si Niel Aldrin Socorro, 19 kag residente sang Barangay Pagsanga-an, Pavia, Iloilo matapos ang natabo nga head-on collision sa truck nga ginamaneho ni Denmark Gambito, 36 kag residente sang Buenavista, Guimaras.
