Ginsuspend sang Land Transportation Office (LTO) sang 90 ka adlaw ang driver’s license sang isa ka Transportation Network Vehicle Service (TNVS) driver nga magluwas nga ginpilosopo ang mga pasahero, ginhanaan pa niya nga bun-on ang mga ini sa Manila.
Base sa panaysayon sang babaye nga pasahero, nag-book sila sang iya nga nobyo sa isa ka ride-hailing app kag sang palapit na sila sa drop-off location sang nagsala sang liko ang driver, ginhambal sila sini nga papanaugon nalang sila sa isa ka lokasyon nga malayo sa ila nga destinasyon.
Didto na nagreklamo ang pasahero kag ginbuyayaw sila sang driver.
Nagbais ang driver kag ang magnobyo kag napilitan nga manaug ang mga ini sa Binondo.
Nanaog man ang driver kag naghatag sang bayad ang magnobyo.
Apang nagbalik ang driver sa kotse, nagkuha sang kutsilyo, kag ginhanaan ang mga biktima.
Gilayon naman nga gin-report sang magnobyo ang insidente sa otoridad kag nakalab-ot man ini sa LTO.
Nag-isyu man sang show cause order ang LTFRB batok sa inDrive nga amo ang kompaniya kun sa diin nagatrabaho ang driver.
Sa isa ka pahayag, ginsiling ni LTFRB chairperson Atty. Teofilo Guadiz III nga dapat ipaathag sang inDrive kun ngaa indi dapat pagkanselahon ukon suspendihon ang ila nga accreditation bangud sa ginhimo sang ila driver.
