PASSI CITY – Patay ang driver sang motorsiklo matapos nga natuhog ang ulo sa nagalabaw nga sansalon sa ginakay-o nga dalan sa Brgy. Man-it, Passi City.
Ang biktima amo si Eduardo Rodriguez, residente sang 223 Dominguez Street, Mabutang Abucay, Bataan apang temporaryo nga nagapuyo sa Brgy. Man-it sa syudad sang Passi.
Sa interview sang Bombo Radyo Iloilo kay Pol. Lt. Col. Dennis Pamonag, hepe sang Passi City Police Station, iya ginpahayag nga aksidente nga nakabunggo ang biktima sa mga signages.
Nagtabog gid ang biktima sa ginaka-ayo nga dalan kag natuhog ang iya nga ulo sa sansalon. Gilayon nga gindala sa Don Valerio Palmares Sr. Memorial District Hospital ang biktima apang gindeklarar nga napatay.
Nahibaluan nga madulom kag wala sang early warning devices sa ginaka-ayo nga dalan kun diin natabo ang insidente.
