ILOILO – Nagakinahanglan nga masolbar sang isa ka Drug Cleared Barangay ang problema sa ilegal nga droga sa sulod lang sang 30 ka adlaw agud indi ma kansela ang ila nga drug cleared status.
Sa interview sang Bombo Radyo kay Shey Tanaleon, tagapamaba sang Philippine Drug Enforcement Unit 6 iya ginpahayag nga kun may yara sang ma report nga bag o nga drug personality sa isa ka drug cleared barangay nagakinahanglan nga ipaidalom ini sa rehabilitation kag nagakadapat man nga ipaidalom sa search warrant, warrant of arrest ukon drug operation.
Suno kay Tanaleon, sa tion nga indi ini masolbar sa sulod sang 30 ka adlaw naka depende na sa Regional Oversight Committee nga ginapamunuan sang Philippine Drug Enforcement Agency kaupod man ang Philippine National Police, Department of Interior and Local Government kag Department kun bala irevoke ang status sang barangay.
Dugang sang natungdan, magapangatubang naman sang nagaka igo nga silot ang drug cleared barangay nga wala gina report ang mga bag-o nga drug personality agud protektahan ang ila nga status.
