Ginpanindugan ni Caloocan City 2nd District Rep. Edgar Erice sa iya manifestation sa Kamara nga indi sala ni Cavite 4th District Rep. Kiko Barzaga kun ngaa manubo ang panan-awan sang mga tawo sa Kongreso kasunod sang mga eskandalo kaangay sang flood control projects kag budget insertions.
“My concern is whether expulsion would be perceived as punishment for dissent rather than genuine disorderly behavior,” suno kay Erice.
Gintawag man sang kongresista ang desisyon sang lower chamber nga “tyranny of the supermajority” agud nga mapaayo ang buot sang mga tawo sa pwesto nga na-offend bangud kay Barzaga.
Ginpanindugan man sini nga wala sang record sang pagpangawat si Barzaga kag wala sang conflict of interest — indi kaangay sang “cong-tractors” kag mga incvolved sa budget insertions.
Matandaan nga lakip sa nangin kontrobersyal nga posts ni Barzaga amo ang pagtawag sa Kamara nga “crocodile farm” — bagay nga suno kay Erice repleksyon sang panan-awan sang madamo nga mga Pilipino sa Kongreso.
“Hindi kasalanan ni Kiko Barzaga kung buwaya at korap ang tingin ng maraming mga Pilipino sa atin,” dugang ni Erice.
Sa boto nga 265-14 kag 8 abstentions, dalayon na nga ginpahalin sang lower chamber si Barzaga kagab-i kasunod sang rekomendasyon sang Ethics Committee.
“The Committee considers that another penalty of suspension will not likely deter the improper behavior, which continuously reflects negatively on the image of the House of Representatives,” suno sa committee report sang Ethics Committee nga gin-sponsor ni 4PS Party-list Rep. JC M. Abalos .
“After deliberation on the case, the Committee found Rep. Francisco ‘Kiko’ A. Barzaga of the Fourth District of Cavite to have committed disorderly behavior and conduct unbecoming of a Member of the House of Representatives.”
Antes sini nga desisyon sang Kamara, duha ka beses na nga nadagdagan si Barzaga sang 60 ka adlaw nga suspensyon.
Nakaserbe anay si Barzaga bilang House assistant majority leader sa 20th Congress antes siya nangin vocal critic ni President Bongbong Marcos kag anay House Speaker Martin Romualdez.
Nag-resign siya sa National Unity Party sang September 2025 matapos na-link sa alleged plot agud nga kakason si Romualdez. Myembro subong si Barzaga sang Partido ng Demokratiko Pilipino (PDP) nga partido ni former president Rodrigo Duterte.
Ini nga 27-anyos nga kongresista ang nakaduso man sang anum ka mga hagna sa iya 11 ka bulan nga pagtinir sa Kongreso lakip na ang proposal nga himuon nga legal ang divorce sa Pilipinas. Nangin co-author man siya sang lima ka iban pa nga bills sandig sa iya nga congressional profile.#
