Nagpanugyan si Senator Francis “Chiz” Escudero nga dal-on na sa Korte Suprema ang isyu sa tunga sang nanday Senator Alan Peter Cayetano kag acting Senate President Sherwin Gatchalian.
Si Gatchalian ang gin-eleher sang Hunyo 3 bilang Senate President Pro Tempore kag acting Senate President, apang nagapanindugan si Cayetano nga iligal ang eleksyon sang Gatchalian bloc bangud 12 lang sila gani wala nila ini ginakilala kag ginapanindugan sini nga siya gihapon ang Senate leader.
Suno kay Escudero nga nakapungko man anay nga Senate President, ang pagdala sang isyu sa korte amo ang pinakamaayo kag malinong nga paagi sa pagtumod kon sin-o gid ang may matarong nga katungdanan.
Ginhatagan niya sang ehemplo ang kaso nga Avelino v. Cuenco sang 1949 nga nagtuhaw man halin sang nagluntad ang tension sa Senado.
“May basehan. Ang Avelino vs. Cuenco ay denisisyonan ng 1935 Constitution. Magkaiba ang Saligang Batas natin ngayon at noon. Pero sa aspetong ‘yan pareho. Ang issue [rin] noon ay Senate president,” pahayag sini.
Para kay Escudero, paagi sa amo nga kaso, makit-an nga may importante nga papel ang Korte Suprema sa pagsolbar sang subong nga kontrobersiya.
Gindugang pa niya nga ang korte mahimo magsunod ukon maghimo sang lain nga interpretasyon sa nauna nga desisyon, apang sa katapusan, ang korte gihapon ang magahatag sang pinal nga paghukom agod malikawan ang pag-init sang tensyon, pagbinaisay, ukon iban pa nga komprontasyon, kag makahatag sang klaro nga direksyon sa pagpanguna sang Senado.
“Nakakalungkot bilang miyembro ng senado… Subalit may remedy naman, kung ‘di ka sang-ayon hindi ka pwedeng mag-matigas na lamang… Dumulog sa korte at hayaan natin ang korte na magpasya,” dugang ni Escudero.
PAGBALIK SA INTEGRIDAD SANG SENADO
Ginalantaw man sang isa ka abogado nga mangin tuman ka gamo ang sitwasyon sa Senado pananglitan mag-abot na ang una nga hearing sang impeachment case sa Hulyo nga wala pa na-resolbar ang away sa tunga sang duha ka faction subong sa upper chamber.
Sa interview sang Bombo Radyo kay Atty. Nestor Jeremy Moreno, law professor sa University of San Agustin-College of Law, iya ginpahayag nga makabig na ini nga constitutional problem.
Suno sa iya, mahimo ma-suspend ang proceeding kun mag-agaway ang duha ka kampo kun sin-o ang mangin presiding officer.
Ini ang rason suno kay Atty. Moreno nga dapat dal-on na ang isyu sa Supreme Court agud nga ma-resolba kag maklaro kun ano ang husto nga pakataran nga sundon sang mga senador.
Suno sa abogado, indi na maayo ang nagakatabo subong kag nagakaguba na ang maayo nga karakter sang institusyon bangud sang leadership gridlock sa tunga sang faction nanday Gatchalian kag Cayetano.
Pahayag pa sang abogado, ang pagdala man sang isyu sa Supreme Court amo ang man ang mangin yabi agud nga mabalik ang integridad sang institusyon kag mabalik man ang salig sang publiko sa Senado.#
