Gin-imbitar, ginbawi, kag gin-imbitar liwat sa hearing sang Senate Blue Ribbon Committee ang 18 ka former military personnel nga amo ang nag-alegar nagdul-ong sang binilyon ka pesos nga kuwarta sa mga opisyal sang gobyerno.
Sa isa ka sulat nga may petsa Hunyo 1 kag gin-post sang abogado sang “ex-marines” nga si Atty. Levito Baligod, nakabutang nga gin-imbitar sang committee ang 18 ka anay nga enlisted personnel nga magtambong sa pagpadayon sang imbestigasyon.
Sang Hunyo 2, nag-post si Atty. Baligod sang screenshot sang email nga ginaalegar halin sa committee nga nagasiling nga gin-withdraw ang imbitasyon sunod sa mandu ni committee chairperson Sen. Pia Cayetano.
Tatlo ka oras ang nakaligad matapos ang amo nga post, nagsiling liwat si Baligod nga madayon ang hearing base sa schedule.
Nahibaluan man sini suno sa iya nga nahangawa ang iban nga mga senador sa posible tuyo sang administrasyon nga pagpang-harass ang mga myembro sang Senate majority bloc.
Sunod man nga ginkumpirma sang committee nga madayon na ang hearing sa flood control scandal sa Huwebes, Hunyo 4.
Matandaan nga nagpa-presscon ang alleged ex-marines kag nag-alegar anay nga nagdul-ong sila sang P805 billion nga flood control kickbacks nga nakasulod sa maleta.
Ini nga former military personnel ang ginaalegar nga gin-hire bilang mga bagman para kay Co.
Lakip sa ila ginpanglawag nga ila gindul-ungan amo sanday former Ako Bicol representative Zaldy Co, former speaker kag subong Leyte Rep. Martin Romualdez, kag pila ka administration officials lakip na si President Marcos kag myembro sang iya pamilya.
Ini nga mga indibidwal kag pati na si Atty. Baligod ang nagapangatubang subong sang kaso sa Department of Justice (DOJ) lakip na ang perjury, cyber libel, unlawful use of means of publication kag unlawful utterances.
Sa hearing subong nga semana, ang magapungko bilang head of inquiry amo si Sen. Rodante Marcoleta nga amo ang chairman sang Blue Ribbon subcommittee. Lakip man sa gin-imbitar nga resource person amo si Romualdez.#
