ILOILO CITY – Madugay na nga wala sa active list sang Philippine Drug Enforcement Agency – Region VI ang drug surrenderer nga ginluthang-patay sang riding-in-tandem suspects sa Barangay Tabucan, Mandurriao, Iloilo City.
Una na nga ginpahayag nga graduating na sa community-based drug rehabilitation program ang biktima nga si Agustine ‘Nonoy’ Odicta, 52, residente sang Barangay Malipayon, Iloilo City Proper.
Ang biktima ang pakaisa man ni the late Melvin Odicta Sr., isa sa mga identified top drug lords sa Western Visayas.
Sa interview sang Bombo Radyo kay Shey Tanaleon, spokesperson sang PDEA Region VI, iya ginpahayag nga yara lang sa suspense list ang biktima.
Nadala ang biktima sa monitoring kag sa surveillance bangud sang una, naga-coordinate ini sa mga tawo nga active sa iligal nga droga.
Apang ginpahayag ni Tanaleon nga wala man ini naaktuhan nga may iligal nga transaksyon sa iligal nga droga.
Nahibaluan nga sa subong, madulom man gihapon ang imbestigasyon sang Mandurriao Police Station kag nagapabilin nga wala nakilal-an ang motorcycle-riding suspects nga amo ang nag-execute sang krimen sang nagligad nga Hwebes, pasado 6:00 sa gab-i.
