ILOILO CITY – Kinahanglan pa ang dugang nga pagtuon kag pagpangonsulta sa nanuhay-tuhay nga sektor antes ipatuman ang ‘No Vaccine, No Work’ policy.
Ini ang reaksyon sang business sector may kaangtanan sa pagbukas sang diskusyon sang nasambit nga polisa sa publiko kun sa diin madamo na ang nagpabutyag sang pagpamatok apisar wala pa sang konkreto nga mga detalye nga naplastar.
Sa interview sang Bombo Radyo kay Lea Lara, executive director sang Iloilo Business Club, iya ginpahayag nga premature pa ukon tuman pa subong ka-temprano para sa mga negosyante nga magkomento bangud wala pa sang pormal kag specific nga proposal.
Ang kinahanglan subong suno kay Lara amo mas masangkad nga information dissemination agud mapahibalo man sa mga empleyado ang iban nga opsyon may kaangtanan sa bakuna.
Naantisipar naman sang business sector ini nga plano suno kay Lara apang ginahulat pa ang pormal nga proposal halin sa gobyerno.
