POTOTAN, ILOILO – 42 ang nangin successful blood donors sa ginpatigayon nga bloodletting activity sang Upsilon Phi Sigma sa Pototan, Iloilo kaupod ang Dugong Bombo sang Bombo Radyo Philippines.
Sa interview sang Bombo Radyo kay Jhun Defensor, chairman sang Iloilo Provincial Executive Council – Upsilon Phi Sigma, iya ginpahayag nga madamo gid ang nagsuporta sa ila nga grupo nga naghalin pa sa nanuhay-tuhay nga lugar sa probinsya sang Iloilo kaangay sang Northern Iloilo, syudad sang Passi, kag mga banwa sang Mina, Pototan, San Joaquin kag Pavia.
Madamo pa kuntani suno sa iya ang nagkadto sa aktibidad apang wala lang nakapasar sa screening.
Ginhiwat ang aktibidad sa West Visayas State University -Pototan Campus kag ginsunod ang tanan nga minimum health protocols batok sa COVID-19.
Ang bloodletting activity ang ginsuportahan man sang local government unit sang Pototan, Barangay Council sang Barangay Cau-ayan kag ang Western Visayas Medical Center blood bank.
Ang masunod nga Dugong Bombo ang hiwaton sa Disyembre 23 sa Passi City Arena sa syudad sang Passi.
