Gindagdagan na sang panibag-o nga warrant of arrest ang duha ka mga Pinoy sa Japan bangud sa kaso nga pagpatay sa mag-asawa nga Hapon sa Tokyo sang nagligad nga Enero.
Ini amo sanday Bryan Jefferson Lising Dela Cruz, 34, kag Hazel Ann Baguisa Morales, 30, nga una na nga na-indict bangud sa kaso nga pag-abandona sang bangkay sang mga biktima nga sanday Norihiro Takahashi, 55, kag asawa sini nga si Kimie, 52, sa sulod mismo sang ila nga balay.
Ginalantaw nga magkilalahay ang duha ka Pinoy sang yari pa sila sa Pilipinas apang indi klaro kun ano sila ka-suod ukon ano ang ila nga relasyon.
Si Morales amo ang ex-girlfriend sang anak nga lalaki sang mga biktima.
Suno sa pulis, gina-alegar nga ang duha ka Pinoy ang nagsulod sa balay sang mag-asawa sa Adachi Ward sa Tokyo sang Enero 16 kag didto kag ginbuno-patay ang mga biktima.
Pareho man nila nga ginpanginwala ang ila nga involvement sa amo nga krimen sang tion nga sila ang gindakop.
Ginapatihan nga si Morales nga residente man sang Adachi Ward ang nakautang sang kuwarta halin sa iya nga former boyfriend kag may yara sang indi paghangpanay sa duha ka mga biktima bangud sa iya nga relasyon sa ila nga anak.
Si Dela Cruz naman ang residente sang Tsuchiura sa Ibaraki Prefecture, northeast sang Tokyo, kag nag-abot sa Japan bilang technical trainee sang nagligad lamang nga Hulyo 2023 kag naga-trabaho sa isa ka construction-related company.
Enero sang gin-aresto si Dela Cruz kun sa diin gintuad sini sa otoridad nga kaupod siya sa nag-abandona sa bangkay sang mag-asawa apang si Morales lamang ang nagpatay sa ila.
Madumduman nga nakit-an ang bangkay sang mag-asawa sa bathroom floor sang nagligad nga Enero 18.#
(via The Japan Times)
