Duha na ka mga tawo ang napatay bangud sang wildfire sa Texas nga amo na ang ginakabig pinakadaku nga sunog sa bug-os nga maragtas sang estado kag mahimo man malinya sa pinakadaku nga fire incidents sa bug-os nga kasaysayan sang Estados Unidos sang Amerika.
Ang mga biktima amo ang 83-anyos nga tigulang nga babayi sa Hutchinson County nga naabtan sang sunog sa iya puluy-an; samtang ang isa amo ang 44-anyos nga babayi nga driver sang truck nga nagapauli na kuntani halin sa Oklahoma pakadto sa Amarillo apang napalibutan sang kalayo ang iya salakyan.
Magluwas diri, linibo man ka mga baka ang napatay kag ginakahangaw-an nga may daku nga epekto sa 12 million nga populasyon sang amo nga sapat sa bug-os nga Texas.
Sa subong, masobra na sa 1.1 million nga ektarya ang nasunog kun sa diin halos pareho na ini sa kadakuon sang estado sang Delaware.
Singko porsyento pa lamang sini nga sunog ang napalong kag ginakahangaw-an nga maglala pa sa weekend bangud sang mabaskog nga huyop sang hangin.
Sa Oklahoma, ang US state nga yara sa north sang Texas, masobra naman sa 30,000 ka ektarya ang nalamon sang kalayo suno sa Oklahoma Department of Emergency Management.#
