Duha patay, isa pilason sa pagpamuno sa Molo, Iloilo City

ILOILO CITY–Duha ang patay, isa ang pilason matapos nga ginpangbuno ang mag-pamilya sa sulod sang balay sa Brgy. San Antonio, Molo Iloilo City.
Sa interview sang Bombo Radyo kay SPO4 Greg Matuntino, imbestigador sang Molo Police Station, iya ginpahayag nga ginsulod sang duha ka mga suspek ang balay sang nasambit nga pamilya.
Ang mga ginbawian sang kabuhi ang ginkilala sanday Teresita Tagriza, 74 anyos kag kabulig nga si Remedios Malaga, 53 anyos.
Pilason naman si Julie Ann Tagriza Peñafiel, 35 anyos, nga napilasan sa kamot matapos nga ginsagang niya ang kutsilyo nga tuyo kun tani ibuno sa iya duha ka tuig nga bata nga si Svenn Peñafiel.
Suno kay Matuntino, nakibot na lang ang mga kasilingan sang mga biktima sang naguwa si Peñafiel samtang nagabitbit sa iya nga bata.
Ginapahayag nagpabilin pa ang mga suspek sa tyangge sa guwa sang balay sang mga biktima matapos ang krimen.
Nahibalu-an nga ang pamilya Tagriza ang nagapa-utang nga isa sa ginalantaw nga motibo sa krimen.
Nadakpan na ang isa sa mga suspek nga si Rene Diocos Jr., 22 anyos kag 3rd year Electrical Technology sa isa ka unibersidad sa La Paz, Iloilo City.