Ginpasalig ni anay Presidente Rodrigo Duterte nga kun mangin presidente ang iya anak nga si Vice President Sara Duterte, hingyuon niya ini nga himuon nga prayoridad ang reporma sa duta.
Kabahin ini sang iya nga speech sa Barangay Pandaitan sa Paquibato district sa Davao City para sa Araw ng Barangay kun sa diin nagpanawagan ini sa mga katapo sang New People’s Army nga magbalik na sa sabak sang gobyerno.
Suno sa anay presidente, isiling sini kay Sara nga wala man sang utang nga kabalaslan sa mga manggaranon gani dapat nga unahon ang land reform kag ipanghatag ang duta sa mga tawo.
“Panahon na siguro nga, kung si Inday ang mag-presidente, ingnon gyud nako sa iyaha, ‘Day, wala man tay utang kabubut-on sa mga dato, unaha na nang reporma sa yuta. Bungkaga nang dato, ihatag na lang sa mga tao,” kabahin sang speech sang anay chief executive.
Bisan nga may apat ka tuig pa nga nabilin sa termino ni Sara bilang bise presidente, ginsiling sang amay nga Duterte nga kun mangin presidente na ini, makaamat-amat ini implementar sang land reforms para sa mga pigado.
“Ug ma-presidente si Inday, puhon, maluoy ang Ginoo og modagan. Unom ka tuig man na. Hinay-hinayon lang niya. Dili niya biglaan kay dako pud ang mawala,” pahayag pa sini sa iya speech.
Una na nga nagpamalibad si Sara sa pagsabat kun ano ang iya plano sa pulitika bangud malayo pa suno sa iya ang 2028 kag mas gusto sini nga tutukan anay ang iya trabaho bilang education secretary kag vice president sa Pilipinas.
Sa ulihi nga survey sang Pulse Asia, halos pareho sanday Senator Raffy Tulfo kag Duterte bilang most preferred presidential candidates sa 2028.
Nakalab-ot si Tulfo sa 35 percent preference share sa respondents, samtang si Duterte ang may yara naman sang 34 percent.#
