Nagpanawagan ang isa ka economic expert sa gobyerno nga maghimo sang mas mabaskog kag konkreto nga tikang agud mabuligan ang mga pamilya nga Pilipino samtang padayon ang pagtaas sang presyo sang langis, kuryente, kag iban pa nga nagapanguna nga balaklon.
May kaangtanan ini sa ginaduso nga pagbuhin ukon pag-suspend sang value-added tax (VAT) sa mga essential items pareho sang fuel, electricity, cooking gas, kag bulong.
Sa interview sang Bombo Radyo kay Mr. Bonnie Ladrido, Executive Director sang Institue of Contemporary Economics, iya ginpahayag nga kun mabuhinan ang VAT, maganubo man ang presyo sang mga ini nga direkta nga makabulig sa adlaw-adlaw nga galastuhon.
Apang, suno sa iya nga indi bastante nga buhinan lang ang tax.
Paathag niya, kun maganubo ang kita sang gobyerno bangud sa VAT cut, kinahanglan nga buhinan man ang iban nga mga gasto sini bangud kun indi, mapilitan ini nga mangutang, nga mahimo magdulot sang mas dako nga problema sa palaabuton kag ipapas-an ini sa pumuluyo.
Base sa pagbanta sang Department of Finance (DOF), madulaan ang gobyerno sang masobra sa P200 billion kun ma-suspend ang excise tax kag value-added tax (VAT) sa bilog nga tuig.
Agud matatapan ini, ginrekomenda niya nga magbuhin ang gobyerno sa budget pareho sang mga proyekto nga indi tuman ka importante nga galastuhan kaangay sang travel kag administrative expenses.
Kalakip man ang pagpaiway anay sang pila ka infrastructure projects nga indi pa man kinahanglan gid, pagbuhin sa subsidiya sa pila ka government-owned corporations, kag iban pa.
Suno sa iya, bastante ang mga tikang nga ini agud makatipon sang pondo nga indi maapektuhan ang importante nga serbisyo sang gobyerno.
