ILOILO – Dapat nga susteniron anay ang Enhanced Community Quarantine (ECQ) sa probinsya sang Iloilo.
Sa interview sang Bombo Radyo kay Iloilo Governor Arthur Defensor Jr., iya ginpahayag nga alang-alang pa nga pahalugan ang quarantine measures sa probinsya nga subong naka-record na sang 18 ka kumpirmado nga kaso sang coronavirus disease 2019 (COVID-19) sa diin apat ang patay.
Ini man ang pahayag sang gobernador kasunod sang pag-anunsyar sang Inter Agency Taskforce Against Coronavirus Disease 2019 (COVID-19) subong nga adlaw nga nalakip ang Iloilo sa high-risk nga mga lugar sa diin dapat tsekyaron liwat ang posible pagpalawig sang ECQ.
Suno kay Defensor, indi niya luyag nga maglupok ang kaso sang COVID-19 sa probinsya kaangay sang nagluntad sa iban nga lugar, bangud kun matabo ini, daw kaangay nga wala sang pulos ang naumpisahan nga mga lihok.
Ginahingyo man ni Defensor ang paghangop sang publiko subong nga limitado sa gihapon ang hulag sang tanan sa bug-os nga probinsya.
Suno kay Defensor, kun isipon, wala sang inter-municipality transmission sa Iloilo kag nagatapik lamang ang virus sa mga malapit nga pamilya ukon katrabaho sang COVID-19 positive kag mas maayo ini nga record ipaanggid sa iban nga lugar.
Sa subong, suno kay Defensor, ang rekomendasyon sang national government ang dapat sundon samtang ginasigurado sang Iloilo Provincial Government nga balanse ang dalagan sang tatlo ka mayor nga aspeto: Local Government Unit (LGU), ospital, kag ekonomiya.
“RESOURCES?”
May kaangtanan naman sa kapasidad sang probinsya sa paghatag sang assistance sa mga pumuluyo nga mangin apektado sang posible pagpalawig sang lockdown tubtob sa Mayo 15, suno kay Defensor, ini ang ginatinguhaan pa nga balansehon sang Iloilo Provincial Government.
Suno sa natungdan, subong nga adlaw, may patigayunon nga pagsinapol kaupod ang mga alkalde sang mga kabanwahanan.
