ILOILO CITY – Maswerte nga nakaluwas ang driver matapos nahulog ang ginasakyan nga elf truck sa floodway sa Barangay Balabago, Jaro, Iloilo City.
Ang driver amo si Alex Siva, 61, residente sang San Joaquin, Iloilo.
Sa interview sang Bombo Radyo kay Michael Maravilla, tag-iya sang truck, iya ginpahayag nga ma-park na kuntani si Siva sa kilid sang floodway apang ginhalin pa gid niya ang salakyan agud nga mahatagan ligwa ang iban nga salakyan.
Ang natabo — naglapaw ang goma sa riprap, nag-lock ang manibela, kag wala nakontrol rason nga naubos gid hulog ang lawas sang truck.
Gilayon naman nga nakatakas ang driver nga wala man sang naangkon nga injuries.
Bangud taob na sang nagligad nga gab-i, wala na nahingagaw nga napasaka ang truck. Aga na sang gingamitan sang crane agud nga makuha ang truck nga nakitaan naman sang damage sa unahan nga bahin.
