Patay ang empleyado sang munisipyo sang Concepcion, Iloilo matapos makabunggo ang ginamaneho nga motorsiklo sa isa pa gid ka motorsiklo nga mahana kuntani nga matabok sa National Road sang Sitio Nangka, Barangay Calamigan, Concepcion, Iloilo.
Ang biktima amo si Leonie Boy Dumali Artacho, 36, residente sang Barangay Macalbang, Iloilo, kag nagatrabaho bilang driver sang Municipal Disaster Risk Reduction and Management Office sang amo nga banwa.
Ang driver naman sang isa pa ka motorsiklo amo si Renz Gumaya Brito, 18-anyos, kag residente sang Sitio Luy- a, Barangay Jamul- awon, Concepcion.
Sa interview sang Bombo Radyo kay PSMS Mark Gregory Barbo, imbestigador sang Concepcion Municipal Police Station, iya ginpahayag nga halin sa Poblacion, Concepcion si Artacho kag padulong kuntani sa banwa sang Sara, apang sang makalab-ot sa lugar sang aksidente, nakabunggo ini sa motorsiklo nga matabok kuntani sa wala nga bahin sang karsada.
Nakaagum sang menor nga kapilasan si Brito, samtang ginbawian naman sang kabuhi si Artacho bangud sa patal nga pilas sa iya nga ulo.
Sa subong, yara sa kustodiya sang Concepcion MPS si Brito, kag wala pa sang pinal nga desisyon ang pamilya sang biktima mapasaka sang kaso ukon may matabo nga aregluhanay.
