Ginpili ni President Ferdinand ‘Bongbong’ R. Marcos, Jr. bilang tiglikom sang Department of Energy (DOE) si Raphael Perpetuo Lotilla nga amo man ang nagpungko bilang energy secretary sa idalom sang administrasyon ni former President Gloria Macapagal-Arroyo.
Tumandok sang Sibalom, Antique si Lotilla kag isa ka former Deputy Director General sang National Economic and Development Authority (NEDA).
Isa man siya ka law professor sa University of the Philippines kag may Masters of Laws halin sa University of Michigan Law School sa Ann Arbor, Michigan.
Kilala man si Lotilla sa energy sector bangud naka-serbe siya bilang presidente sang Power Sector Assets and Liabilities Management (P-SALM) Corporation, kag chairman sang Philippine National Oil Company, isa ka energy company nga gintukod sang November 9, 1973 bilang government-owned kag controlled corporation kag natukod sa panahon ni former President Ferdinand Marcos agud makasupply sang langis sa Pilipinas.
Daku ang mga pagpanghangkat nga gina-atubang subong sang energy sector kag daku man ang katungdanan ni Lotilla.
Una na nga ginpahayag sang Institute for Climate and Sustainable Cities (ICSC) nga lakip sa mga pagpanghangkat amo ang indi bastante nga power supply kag reserves nga posible tuga sang prolonged shutdowns sang power plants, intermittent breakdowns sang daan kag bag-o nga coal-fired power plants, kag ang derating sang natural gas power plants nga tuga sang Malampaya gas supply restrictions.
Apang gin-athag man sang administrasyon nga NOMINATION pa lang ang ginhimo sa designation ni Lotilla kag pending pa ang clarification sa iya employment status.
Ini bangud independent director si Lotilla sang Aboitiz Power kag Enexor.
Sa idalom sang Republic Act 7638 ukon Act Creating the DOE, “indi pwede nga mangin secretary ang officer, external auditor, accountant, or legal counsel sang anuman nga private company ukon enterprise sa energy industry within two (2) years halin sa iya nga retirement, resignation, ukon separation sa kumpaniya ukon enterprise.
