Padayon nga maga-apekto ang enhanced southwest monsoon sa kadam-an nga parte sang Pilipinas subong nga adlaw apisar nga nagapalapit na ang Bagyo Inday sa Sakishima Islands sa Southern Japan.
Sandig sa alas singko sa kaagahon nga weather bulletin, pabaskugon sang bagyo ang Habagat nga magadala sang pagmadlos sang hangin ilabi na sa mga mataas nga lugar kag sa mga areas nga malapit sa mga baybayon.
Suno sa Philippine Atmospheric, Geophysical and Astronomical Services Administration ukon PAGASA, ulihi nga nakit-an ang sentro sang bagyo sa kalayuon nga 500 km naaminhan-nasidlangan sang Itbayat, Batanes.
Dala sang bagyo ang kabaskugon sang hangin nga 140 km/h malapit sa sentro kag pagmadlos nga tubtub sa 170 km/h.
Padayon ang hulag sini sa direksyon nga pa-naaminhan-nakatundan sa kadasigon nga 20 km/h.
Nagapabilin naman ang northern portion sang Batanes ukon pinakapunta nga bahin sang Pilipinas sa Wind Signal No. 2
Yara naman sa Wind Signal No. 1 ang nabilin nga bahin sang Batanes, Babuyan Islands, kag ang northern portion sang mainland Cagayan.
Gina-forecast sang weather bureau nga magahulag ang bagyo pa-naaminhan nakatundan kag maga-landfall ukon magalabay malapit sa Sakishima Islands sa southern Japan antes ini dalayon nga maggwa sa Philippine Area of Responsibility (PAR) subong nga aga.
Pagkatapos, magatabok ang bagyo sa East China Sea kag maga-landfall sa eastern coast sang mainland China.
Magapabilin ini sa “typhoon category” sa masunod nga 12 ka oras antes magluya bilang severe tropical storm pagkatapos maglabay sa mainland China.
