ILOILO CITY – Nabaton na sang COVID-19 team ang Executive Order 068 nga pirmado ni Iloilo City Mayor Jerry Treñas tuhoy sa pagpalawig sang Enhanced Community Quarantine.
Sa interview sang Bombo Radyo kay Jeck Conlu, pinuno sang Public Safety and Transportation Management Office, iya ginpahayag nga magapabilin sa gihapon ang quarantine protocol magluwas lang sa weekend block-off.
Suno kay Conlu, ang pahanugutan nga makaguwa sa balay amo ang mga may yara sang quarantine pass kag ang mga empleyado nga nagatrabaho sa medical field, nagapatigayon sang humanitarian works kag emergency response.
Magluwas diri, exempted man ang mga empleyado sang essential businesses kasubong sang botika, hospital, manufacturing, agriculture and fisheries, dental kag ENT clinics, retail establishments, food preparation kag logistics services.
Kasunod sang ginapahayag atrasado nga pagpakaon sa mga nagpauli nga Overseas Filipino Workers nga temporaryo nga nagatinir sa isa ka hotel sa syudad sang Iloilo, ginpahayag ni Conlu nga may yara na sang mandu ang alkalde nga maghatag sang pagkaon kag hygiene kits.
Sa pagpaathag ni Conlu, wala lang sang ihibalo ang Iloilo City Government kun ano ang patakaran sang Overseas Workers Welfare Administration tuhoy sa pagtatap sang mga nagpauli nga OFW apang ang katuyu-an sang alkalde amo nga makahatag sang bulig sa masarangan sang syudad.
May kaangtanan naman sa iban pa nga kontrobersiya, wala nakahatag sang konkreto nga sabat ang natungdan apang iya ipalab-ot sa Inter-Agency Task Force ang tuhoy sa nasambit nga problema agud nga mahatagan sang solusyon.
