ILOILO CITY – Ginayuhom na lang kag ginasalig sa Ginuo ni Pol Lt Col Jovie Espenido ang pagkadalahig sang iya ngalan sa narco list sang gobyerno.
Sa interview sang Bombo Radyo kay Espenido, iya ginpahayag nga wala na niya ginkakibot ang amo nga sirkumstansya bangud normal lang sa ila trabaho bilang pulis nga maka-eksperyensya sang kaangay nga mga hitabo.
Suno pa kay Espenido, wala niya direkta nga ginpahayag nga may ara sang ‘failure of intelligence’ sa bahin sang Philippine National Police.
Suno kay Espenido, sang ginpamangkot siya sang isa ka social media network (Rappler) reporter kun may yara bala sang failure of intelligence ang tagdumala sang kapulisan, ‘MAYBE’ ang iya nga sabat, nga buot silingon — mahimo nga huo ukon indi — kag naintindihan niya nga may ara pa sang proseso nga ginasunod ang mga police intels.
Dugang pa sang natungdan, tubtob subong, wala man siya nakahibalo kun ngaa nga na-relieve siya sa iya posisyon bilang Deputy City Director for Operations sang Bacolod City Police Office kag pinuno sang City Drug Enforcement Unit.
Pahayag ni Espenido, nagatuman lang siya sang mga orders sa iya, amo nga sa subong, yara siya sa Police Regional Office 6 para sa adjudication process.
Kaangot naman sa duha ka police generals nga amo ang una nga nangin sources sang balita nga nagpahayag sang pagkadalahig sang iya ngalan sa narco list, wala man nakahibalo si Espenido kun sanday sin-o ang mga ini.
Nahibaluan nga sa ginpatigayon nga first public apperance ni Espenido sa Bacolod City kahapon, iya ginphayag nga mga kurakot nga mga politiko ang rason kun ngaa nadalahig ang iya ngalan sa narco list sang gobyerno, kadungan sang iya liwat nga paghingyo sa Philippine National Police nga indi pagpatihan ang mga politiko nga nagahatag sang sala nga mga impormasyon agud lamang gub-on ang kaangay niya nga pulis.
