ILOILO CITY – Ginpasakaan sang National Bureau of Investigation sang kaso nga murder si former Bureau of Corrections Director General Gerald Bantag kag pito ka iban pa bangud sa gina-alegar kamatayon sang isa ka inmate sa New Bilibid Prison.
Suno sa Department of Justice, ginpasakaan sang kaso si Bantag bangud sa kamatayon ni Hegel Lapinig Samson, ang person deprived of liberty nga gina-alegar nagbuyagyag sang kurapsiyon sa sulod sang facility.
Lakip man sa mga ginpasakaan sang kaso amo sanday former Deputy Security Officer Ricardo Zulueta, kag General Victor Pascua kag mga preso nga sanday Rolando Villaver, Mark Angelo Lampera, Charlie Dacuyan, kag Wendell Sualog.
Suno kay Justice Secretary Jesus Crispin Remulla, ng napatay nga inmate ang may yara sang social media page sa idalom sang pangalan nga Leon Bilibid.
Gina-alegar nga ginsaysay sang inmate ang mga misteryoso nga hitabo sa sulod sang Bilibid gani may naakig sa iya kag ginpapatay siya.
Gin-ako sang mga preso ang ila kahilabtanan sa krimen pinaagi sa pagbutang sang bag sa ulo ni Samson tubtob nga napatay ini.
Suno sa isa sa mga preso nga si Villaver, ginmanduan siya ni Bantag nga patyon ang sin-o man nga naangut sa pangalan nga “Leon Bilibid” agud nga mauntat ang mga kritisismo sa social media.
Si Zulueta ang gina-alegar nagpahibalo kay Villaver nga si “Leon Bilibid” ang yara sa iya supervision bilang mayor sang dorm.
Si Pascua naman ang nagpahanumdom kay Villaver nga tumanon ang mando kag indi magbilin sang agi.
Nahibaluan nga sanday Bantag kag Zulueta nga ginpasakaan sang kaso bangud sa gina-alegar nga pagpatay sa broadcaster nga si Percy Lapid kag sa gina-alegar middleman nga si Jun Villamor sang Oktubre 2022.
Ang duha ang nagapabilin nga at large.
Sang ginpamangkot kun ngaa nga madugay ang pagpangita kay Bantag, ginpahayag ni Remulla nga si Banta ang myembro sang 1996 class sang Philippine National Police Academy kag may madamo nga koneksyon sa police force.
Gin-athag ni Remulla nga wala man sila sang sin-o man nga ginakondenar.
