ILOILO – Ginalauman nga maganubo na ang sukot sang kuryente sa pila ka mga banwa sa Iloilo Province.
Ini matapos nag-lapse na bilang layi ang hagna nga nagaduso sa 25-year power utility franchise sang MORE Electric and Power Corporation (MORE Power).
Sa idalom sang Republic Act 11918 ukon modified MORE Power franchise, nasaad nga mahimo na maghatag ang MORE Power sang electricity services sa Syudad sang Iloilo kag Passi; kag mangin sa banwa sang Alimodian, Leganes, Leon, New Lucena, Pavia, San Miguel, Santa Barbara, Zarraga, Anilao, Banate, Barotac Nuevo, Dingle, Duenas, Dumangas kag San Enrique.
Ang mga service areas nga ginhatag sa MORE Power ang ginalakipan sang mga lugar nga naserbisyuhan man sang Iloilo Electric Cooperatives (ILECO) I kag III – ang power utilities nga naghatag sang kuryente sa mga consumers sa sulod na sang pila ka dekada.
Sa interview sang Bombo Radyo kay former Sen. Franklin Drilon, iya ginpahayag nga may option na ang mga consumers kun sa diin magakuha sang supply sang ila kuryente.
Apang suno sa senador, mahimo man nga magpatigayon sang joint agreement ang MORE Power kag ILECO kun ila nga gustuhon.
Nahibaluan nga ang nagadangat sa P11 ang sukot sang ILECO sa ila per kilowatt-hour para sa residential rate.
Samtang ang residential rate naman sang MORE Power ang nagadangat sa P7.23 per kilowatt-hour.
