Kapin sa duha ka milyon ka mga tawo ang nagpakigbahin sa pinakaulihi nga mass protest sa Hong Kong batok sa kontrobersiyal nga extradition bill.
Sa interview sang Bombo Radyo kay Bombo International Correspondent Merly Bunda direkta sa Hong Kong, iya ginpahayag nga narekord ang pinakadako nga protesta sa maragtas sang rehiyon sang nagtipon ang mga pumuluyo sa pihak sang suspension sang hagna nga nagapahanugot sang extradition gikan sa Hong Kong pakadto sa mainland China.
Suno kay Bunda, apisar nga nagpangayo na sang pasaylo ang Hong Kong leader nga si Carrie Lam bangud sa pagproponer sang hagna, apang wala nakontento diri ang mga tawo.
Ginpahayag ni Bunda nga luyag sang mga pumuluyo nga magresign si Lam kag dulaon ang hagna sa baylo nga suspendihon lang.
Nahibaluan nga sa nasambit nga hagna, nasaad nga sayluhon gikan sa Hongkong kag pagadal-on sa China ang mga nagapangatubang sang kaso agud didto pamatbatan.
