Tubtob sa diin ang gahum sang social media influencers partikular na sang mga YouTubers?
Didto sa South Korea, nagsirado ang isa ka daku kag bantog nga restaurant matapos nahalitan ang ngalan bangud sang isa ka food review nga ginhimo sang isa ka YouTuber.
Ang food reviewer kag ginatumod nga YouTuber amo si HayanTree — nga sang amo nga tion — may yara sang masobra 700,000 ka subscribers sa YouTube.
Ginpost ni HayanTree ang video review nga iya ginhimo sa all-you-can-eat soy sauce-marinated crab restaurant sa Daegu, South Korea.
Sang gin-refill ni HayanTree ang iya nga pinggan, may nakit-an nga mga mumho sa iya nga marinade.
Bangud sa iya nakit-an nga mga mumho, nagtaas ang pagduda nga gina-reuse lang ang mga pagkaon nga wala nabaligya sa sulod sang restaurant.
Madasig nga nagviral ang video kag tuman ka daku ang impact sa restaurant amo nga napilitan ini nga magsirado.
Nagpaninguha man kuntani ang restaurant nga magpaathag kag handa man nga magprovide sang footage halin sa security camera agud lang mapamatud-an nga wala nila gina-reuse ang ila baligya nga pagkaon apang gina-block ang ila comments a video review rason nga wala na nabatian sang publiko ang ila nga paathag.
Sang ginlantaw ang footage sang security camera, natukiban nga ang mumho nga ginatumod ni HayanTree ang naghalin lang sa iya una nga putahe nga ginkaon kag ara na nga daan sa iya nga pinggan antes pa man siya nagrefill sang pinggan.
Gin-take down sang YouTuber ang iya nga video kag nag-isyu sang public apology apang ulihi na ang tanan bangud nagsira na ang bantog nga restaurant.
Nagnubo naman ang subscribers sang amo nga YouTuber kag subong posible pa nga magpangatubang sang konsekwensya nga dala sang iya sala nga food video review.
