ILOILO CITY – May nakit-an nga irigularidad ang isa sa mga katapo sang House Committee on Health sa pagpasulod sang Dengvaxia vaccines sa pungsod.
Sa interview sang Bombo Radyo, ginpahayag ni Iloilo 4th District Rep. Ferjinel Biron, antes kuntani ginpasulod sa Pilipinas ang amo nga bakuna, dapat nga narehistro ini sa iya country of origin.
Sa bahin sang Sanofi Pasteur nga naghalin sa pungsod France, wala sang clinical study ang amo nga pungsod tuhoy sa pagka-epektibo sang Dengvaxia kag wala sang nagakaigo nga rehistro pati na sa European Medicine Agency (EMA), ang counterpart sang Food and Drugs Administration (FDA) sa pungsod.
Suno pa kay Biron, kun narehistro lang sa originating country ang Dengvaxia vaccines nga ginakabig nga biological product nga may pharmaceutical effect, kuntani may nagakaigo nga data kag impormasyon nga basehan ang Department of Health tuhoy sa epekto sang bakuna.
Dugang pa ni Biron, dako ang salabton sang Food and Drugs Administration (FDA) kun nga-a narehistro sa pungsod ang Dengvaxia vaccines.
Suno sa mamalidha, kuwestiyunable ang ginhimo sang FDA nga pagrehistro sang bulong sang Disyembre apisar na-manufacture ang bulong 40 ka bulan na ang nakaligad antes ini narehistro.
Indi ini normal suno kay Biron kag bilang regulatory body, ginbasura kuntani sang FDA ang application sang Sanofi.
Wala man nasunod ang proseso suno kay Biron sa diin dapat maka-obtain anay sang lot clearance ang Sanofi.
Kwestiyunable man suno kay Biron kun nga-a ginhimo nga current ang CPR ukon Certificate of Product Registration apisar nga madugay na nga nahimo ang produkto.