Duha ka beses nga nag-abanse ang Netherlands batok sa Japan sa ila group match sa FIFA World Cup 2026, apang duha ka beses man nga ginlagas ini sang mga Japanese tubtub nga nagtakop sa 2-2 draw ang ila hampang.
Una nga naka-score para sa Dutch si Virgil van Dijk sa 51st minute, apang ginbalusan ni Keito Nakamura sang Asian team makaligad lang ang sais minutos.
Nag-abanse liwat ang Netherlands sang naka-goal si Crysencio Summerville sa ika-64 nga minuto. Naghugyaw na ang fans sang European team apang nakalusot pa kag napatas ang hampang sa 89th minute sang naka-goal si Daichi Kamada.
Ginhiwat ang makahalawat-hawat nga group match sa Dallas Stadium sa Arlington, Texas, USA nga nagtakop 6:00 subong nga aga.
Matandaan nga apat ka tuig na ang nagligad, ang Japan amo ang ginkabig nga “surprise package” ukon “dark horse” sa World Cup nga ginhiwat sa Qatar.
Ginlutos nila ang powerhouse team sang Spain kag ang four-time world champion nga Germany antes sila napierde sa kamot sang Croatia via penalties sa last 16.
Sunod nga atubangon sang Netherlands sa Group F ang Sweden sa Domingo 1:00 sa kaagahon samtang makasambuwa naman sang Japan ang Tunisia sa Domingo 12:00 sa udto (Philippine Time).
