Ginbawi na ang temporaryo nga ban sa pag-import sang poultry products halin Japan matapos gindeklarar nga bird flu-free na ang nasambit nga pungsod.
Paagi sa Department Circular Number 40 sang Department of Agriculture (DA), ginpasugtan na liwat ang pag-import sang domestic kag wild birds lakip ang day-old chicks kag hatching eggs halin Japan.
Suno sa ahensya, importante ang amo nga pungsod sa East Asia bilang source sang dekalidad nga breeding stock kag hatching eggs nga ginagamit para mapadayon kag mapauswag ang poultry production sa Pilipinas.
Samtang, suno kay Agriculture Secretary Francisco Tiu Laurel Jr., isa ka science-based approach ang ginhimo sang ahensya agud mabalanse ang food security kag ang proteksyon sa lokal nga industriya sang manok.
“We will never compromise the health of our poultry industry, but we also recognize the importance of keeping reliable supply channels open when science tells us the risk has been effectively eliminated,” pahayag ni Tiu Laurel.
Suno sa DA, tama ka-nubo na ang risgo sang contamination halin sa poultry imports sa amo nga nasyon.
“Lifting the ban supports food security by ensuring access to quality breeding materials, strengthens the competitiveness of our poultry sector, and demonstrates that sound animal health measures can protect both public health and agricultural production,” dugang sini.
Gin-lift ang ban matapos maresolba ang gin-report nga kaso sang avian influenza sa Japan kag wala na sang nasundan nga outbreak.
Sang Nobyembre 2025, matandaan nga una nga ginpatuman sang DA ang ban matapos mag-report ang Japan sang bird flu outbreak sa mga domestic birds sa Shiraoi, Hokkaido.
