Ginklaro sang Department of Agriculture nga ang mga kwalipikado nga makabenepisyo sang P20 per kilo rice program ni President Ferdinand Marcos Jr. amo ang PWDs, senior citizens, single parents kag minimum wage earners.
Mahimo man nga makabakal ang mga drivers, barangay officials, volunteers kag estudyante kon may mabilin pa nga stocks.
Sa interview sang Bombo Radyo kay Geron Magbanua, Acting Provincial Government Head sang Department of Agriculture, iya ginpahayag nga ang rice allocation ginahatag sang DA paagi sa Food Terminal Incorporated ukon FTI kag Agribusiness and Marketing Assistance Division kag ang provincial government ang una nga nakabaton sang 300 bags sang bugas nga naghalin sa National Food Authority.
Base sa guidelines sang Food Terminal Incorporated ang regular buyers mahimo makabakal sang tubtob 10 ka kilo, samtang tubtob 20 kilo naman ang maximum nga mahimo mabakal sang senior citizens kag persons with disabilities ukon PWDs.
Kinahanglan lamang nga magpakita sang valid ID ukon identification card ang mga manugbakal bangud ini gina-encode sa system sang FTI bilang bahin sang monitoring sang beneficiaries.
Ginpahayag pa ni Magbanua nga ginapatigayon ang P20 rice program kada bulan agud mahatagan sang allocation ang nagkalain-lain nga mga banwa.
