Nagamato-mato ang Filipino community sa Turkey agud mabuligan ang ginatos ka mga Pinoy nga apektado sang magkasunod nga 7.8- kag 7.5-magnitude nga linog sa amo nga pungsod kag sa Syria.
Suno kay Bombo Nes Herbo, international correspondent sa Turkey, ginapaagi man sang grupo ang matipon nga mga panapton, pagkaon,kag iban pa nga bulig sa Philippine embassy.
Una na nga ginpahayag sang Department of Migrant Workers (DMW) nga 193 ka mga Pinoy ang apektado sang kalamidad sa tatlo ka Turkish provinces: 113 sa Hatay, 51 sa Adana, kag 29 sa Gaziantep.
Suno kay Herbo, padayon pa subong nga gina-verify ang status sang isa ka Filipino worker sa Hatay ukon ang southernmost province sang Turkey nga reported nga natabunan sang duta.
May reports man nga may missing pa gid nga duha ka mga Pinay.
Sa bahin sang Overseas Workers Welfare Administration (OWWA), nagpaguwa man ini sang statement nga gina-check pa subong ang pahayag nga may nalakip nga Filipino worker sa mga napatay.
Suno kay OWWA chief Arnell Ignacio, wala anay sang kumpirmasyon tubtub nga wala pa sang kumpleto nga detalye.
Ginalauman man sang mga Pinoy sa Turkey ang madasig nga bulig halin sa Department of Foreign Affairs (DFA) lakip na gikan sa 85-person team sang disaster response specialists kag healthcare workers nga ginpromisa nga ipadala sang gobyerno.
Sa subong, tatlo ka bulan nga napaidalom sa state of emergency ang 10 ka mga probinsya sa Turkey samtang lapaw naman sa 12,000 ang tally sang mga nagkalamatay. ##
