Gin-file ni Leyte Representative kag presumptive House Speaker Ferdinand Martin Romualdez ang labing-una nga hagna sa 19th Congress: ang hagna nga nagaduso nga magpain sang P10 billion sa duha ka bangko nga ginapadalagan sang gobyerno agud nga mapasangkad pa ang lending capacities kag mas madamo nga micro, small, and medium enterprises (MSMEs) ang mabuligan.
Sa idalom sang House Bill 1 ukon GUIDE Bill, ginaduso ni Romualdez nga butangan sang P7.5 billion ang Land Bank of the Philippines (LandBank) kag magbutang naman sang P2.5 billion sa Development Bank of the Philippines (DBP).
Sa idalom sang hagna, ang termino nga MSME ang nagapatuhoy sa business activity ukon enterprise nga engaged sa industry, agribusiness, kag services — single proprietorship man, cooperative, ukon partnership or corporation — nga may assets nga indi magsobra sa P3 million para sa micro, P3 million tubtub sa P15 million sa small, kag P15 million tubtub sa P100 million para sa medium.
Co-author diri si presidential son kag Ilocos Norte Representative Ferdinand Alexander Sandro Marcos kag sanday Representatives Jude Acidre kag Yedda Marie Romualdez sang Tingog Party-list.
Nahibaluan nga may kaangay man nga hagna nga ginduso si Quirino Representative Junie Cua sang nagligad nga 18th Congress apang wala nakapasar sa lebel sang Senado.
