Nakit-an na sang mga divers sa Indonesia ang flight data recorder sang nagtibusok nga eroplano nga Boeing 737-500 sang tinalikdan nga Sabado.
Nakit-an man ang separado nga radio beacon kag ginalauman man nga ma-retrieve ang cockpit voice recorder agud nga mahibaluan na sang otoridad kun ngaa nadulaan sang kontrol ang eroplano pila ka minutos matapos ini naghalin sa airport sa Jakarta, Indonesia.
Matandaan nga sakay sang amo nga eroplano ang 62 ka mga tawo. Pakadto kuntani ini sa Pontianak sa Borneo island, ginabanta 740 km ang kalayuon halin sa Jakarta.
Kahapon nga adlaw, dugang man nga mga parte sang lawas sang tawo ang natigayon nga makit-an sa lugar kun sa diin nagtibusok ang 27-anyos nga eroplano.
May yara man sang mga personal nga gamit nga nakit-an kaangay sang mga wallet kag ID.
