ILOILO CITY- Salamahon gid sang Iloilo City Health Office ang pag-check sa tanan nga accomodation establishments, mga kalan-an kag mangin mga shopping malls agud masiguro nga safe ang tubig kag pagkaon kag malimpyo ang mga comforts rooms.
Sa interview sang Bombo Radyo kay Mr. Rudy Catahay, Chief Sanitation Inspector VI sang City Health Office, iya ginpahayag nga ini nga mga lugar ang una gid nga ginakadtuan sang mga turista nga magasaksi sa Dinagyang Festival 2023.
Suno kay Catahay, sa subong, padayon ang inspection sang mga sanitation inspectors agud masiguro nga matinlo ang mga comfort rooms.
Gina-check man ang mga kalan-an agud masigurado man nga may sanitary permit kag health card.
Sa mga food kiosks naman sa Dinagyang Food Festival, kinahanglan nga may nagakaigo man nga health card kag sanitary permit ang kada kiosko kag nagakadapat man nga malimpyo ang tubig nga ila ginagamit paagi sa pag-secure sang laboratory test sa tubig ng nagapakita nga safe ini inumon.
Dugang ni Catahay, ini nga tikang ang may katuyuan nga malikawan ang ano man nga insidente sang food poisoning sa Dinagyang Festival agud magbilin sang positibo nga impresyon sa mga turista.
