Ang siling sa pinaka-popular nga linya sa kada wedding vow: “til death do us part.”
Apang para sa anay prime minister sang Netherlands nga si Dries van Agt kag sa iya asawa nga si Eugenie, mas maayo nga kun magkaupod sila sa kabuhi sa nagligad nga pito ka dekada, magkaupod man sila nga magabiya.
Agaw-atensyon ang istorya sang mag-asawa bangud sa edad nga 93-anyos, ginpili nila nga mapatay paagi sa duo euthanasia — isa ka growing trend sa Netherlands kun sa diin gamay pa gid lamang nga numero sang mag-asawa ang napasugtan sang otoridad nga dungan nga mapatay paagi sa makamamatay nga bulong ukon droga.
Suno sa Rights Forum, isa ka pro-Palestinian group nga gin-establisar ni van Agt sang 2009, nagtaliwan ang mag-asawa sa ila hometown sa Nijmegen. Ginpahayag nga naga-uyatay pa sila sang kamot sang iya pinalangga nga asawa sang sila ang nadulaan sang ginhawa.
Dungan man sila nga ginlubong kag nangin pribado ang amo nga hitabo.
Kilala si Van Agt nga prime minister halin sang 1977 tubtub sang 1982 kag siya man ang nangin una nga lider sang Christian Democratic Appeal party sang amo nga pungsod.
Naka-serbe man siya nga ambassador sang European Union sa Japan kag sa Estados Unidos sang Amerika.
Suno naman sa reports sa Dutch media, nagaluya na ang ikaayong lawas sang mag-asawa halin pa sang nagliligad nga tuig.
Sang 2019, nagsuprer ang anay prime minister sang brain hemorrhage samtang nga naga-deliver ini sang speech sa isa ka commemoration event para sa mga Palestinians.
Halin sang amo nga tion, wala ini naka-recover.
Nangin pribado naman ang mga detalye kaangot sa ikaayong lawas ni Eugenie.
Nahibaluan nga yara lamang sa 29 ka mga mag-asawa ang gintugutan nga mapatay paagi sa duo euthanasia sang 2022 sandig sa datos sang Regional Euthanasia Review Committees sang Netherlands.
Ginapanan-aw man sang Dutch organizations nga magdamo pa ini nga numero apisar nga may makit-an sa mga doktor nga pagpangduha-duha sa paghatag sang euthanasia base sa accumulation sang age-related conditions.
Apang santo sa legal guidelines sang pungsod, ginatugutan ini.
Ang assisted suicide ang nagakatabo kun ang tawo mismo ang nagatublok sang lethal dose sa iya kaugalingon samtang yara ang physician, samtang ang euthanasia naman ang nagakatabo kun ang medical professional ang naga-administer sang bulong sa isa ka pasyente.
Pareho ini nga legal sa Netherlands halin pa sang 2002 apang dapat nga may malab-ot nga partikular nga critera.#
(Credit: Radboud University via CTV News)
