Napatay na sa edad nga 46-anyos ang anay Philippine Basketball Association (PBA) star nga si Peter June PJ Simon matapos ini gin-report nga natumba samtang nagahampang sang basketball.

Wala pa sang opisyal nga impormasyon parte sa rason sang iya kamatayon, apang, sa mga video nga nagalapta sa social media, makita nga ginapapaypayan siya sang iya mga kaupdanan sa higad sang basketball court antes ini gin-alsa kag gindala paguwa matapos nag-collapse samtang nagahampang sa isa ka recreational basketball game sa Davao City.

Napili si Simon bilang ika-43 nga overall pick sa 2001 PBA Draft kag nangin isa sa mga pinakamalawig kag madinalag-on nga manugpanghampang sa liga.

Nagdugay sang 16 ka tuig ang iya karera sa Purefoods/Magnolia franchise kag nakilala sa bansag nga “The Scoring Apostle.”

Nangin kaupod man niya sa team ang franchise icon and shooter nga si James Yap.

Nakakuha si Simon sang walo ka PBA All-Star selections kag duha ka beses nga ginkilala bilang Mr. Quality Minutes.

Isa sa pinakadaku nga kadalag-an sa iya karera amo ang pagbulig sa team nga magdaog sang Grand Slam sang 2014 sa idalom sang pagpanguna ni coach Tim Cone. Nakabulig man siya sa franchise nga makakuha sang walo ka PBA championships.

Sang 2019, bilang paghatag-pagkilala sa iya mga kontribusyon, gin-retire sang iya team ang jersey number 8 nga iya ginasuksok. Nagrekord siya sang average nga 10.1 points sa halos 700 ka hampang antes nagretiro sa PBA sang 2020. Nagbalik pa siya sa professional basketball sang 2024 bilang miyembro sang Davao Occidental Tigers sa Maharlika Pilipinas Basketball League antes liwat nga nagretiro sang 2025.#