Umpisahan na subong nga adlaw ang full implementation sang lifeline rate program nga amo ang magahatag sang discounts sa balayran sa kuryente sang kuwalipikado nga pigado nga mga pamilya.
Suno sa Energy Regulatory Commission, handa na sila nga ipatuman ini kaupod sa Department of Energy kag Department of Social Welfare and Development kasunod sang madinalag-on nga pagpatigayon sang registration caravans.
Suno sa komisyon, ang kuwalipikado lamang sa subsidiya sa amo nga programa amo ang Pantawid Pamilyang Pilipino Program (4Ps) kag non-4Ps electricity consumers nga naga-consume sang indi maglapaw sa 100 kilowatt-hours (kwh) kada bulan kag naka-rehistro sa ila tagsa ka distribution utilities.
Sa pihak sini, ginapahanumdom sa mga distribution utilities nga magpadayon sa pagbaton kag pagproseso sang aplikasyon nga sunod gihapon sa timeline nga nakabutang sa implementing rules and regulations sang amo nga programa.
Hulyo kuntani ang full implementation sini apang ginpaiway sang gobyerno bangud gamay lamang nga 4ps kag non-4Ps ang aplikante para sa subsidiya.
Ang lifeline – ukon ang subsidized rates – amo ang ginahatag sa low-income customers nga nagagamit sang elektrisidad nga mas manubo sa 100 kwh kada bulan kag indi makasarang sa paghatag sang full payment sa ila bill.#
