ILOILO CITY – Nagsaka sang P367 million ang traveling expenses sang Office of the President sang 2022 kun ikumpara sa 2021 bangud sa mga official trips ni President Ferdinand Marcos Jr. sa anum ka mga pungsod.
Base sa Annual Audit Report sang Commission on Audit sa Office of the President, nakita sang state auditors nga ang traveling expenses sang opisina ang nagdangat sa P403 million sang 2022, nga 996% nga mas mataas kun ikumpara sa 2021 spending nga yara lang sa P36.8 million.
Kadam-an sini ang para sa traveling expenses sa foreign trips nga nagdangat sa P392 million sang 2022 kag P25 million sang 2021 nga naga-represent sang kabilugan nga gasto ni anay President Rodrigo Duterte sa iya katapusan nga tuig bilang presidente.
Ang Traveling Expenses-Foreign account ang ginagamit agud nga mahibaluan ang gasto sa movement ukon pagbyahe sang mga government officers kag employees sa gwa sang pungsod.
Ini nga account ang ginabug-usan sang transportation, travel per diem, passport kag visa processing, kag iban pa nga travel-related expenses.
Ang mga pungsod nga ginkadtuan sang presidente amo ang Singapore, Indonesia, United States of America, Cambodia, Thailand, kag Belgium.
Samtang, ang travel expenses sang Office of the President para sa local engagements ang nagnubo sa P10.8 million sang 2022 nagikan sa P11.5 million sang 2021.
Ang training expenses ang nagnubo man sa P66 million sang 2022 nagikan sa P70 million sang 2021.
Nagnubo man ang gasto sang Office of the President sa scholarship grants nga yara na lamang sa P219,110 nagikan sa P510,740.
