Ginpalakpakan ang sabat ni Defense Secretary Gilberto Teodoro Jr. batok sa China matapos nga gin-daho sa iya ang isa ka note samtang nagahambal siya sa Seoul Defense Dialogue (SDD) 2026 sa South Korea.
Sa amo nga sulat nga halin sa Chinese delegation, nakabutang nga “illegal, null, and void” ang 2016 South China Sea Arbitration Award nga nadag-an sang Pilipinas.
Ini nga Unclos 2016 ruling amo ang landmark award nga nagakilala sang claim sang Pilipinas sa West Philippine Sea.
Wala nahandaan ni Teodoro nga may sulat nga ihatag sa iya sa forum, apang ginbasa niya ini gihapon sa atubang sang publiko, kag naghatag sang maisog nga sabat.
Ginhatagan ni Teodoro sang importansya ang pagtib-ong sang international law ilabi na ang United Nations Convention on the Law of the Sea (UNCLOS) kag ang pagtahod sa naestablisar na nga international norms.
Ginhambal man sang tiglikom kun ano kabastos ang timing sang paghatag sang amo nga note samtang nga yara sila sa international forum — bagay nga ginakabig sini nga indi pagtahod sang Chinese delegation sa host nga amo ang Republic of Korea.
“It not only disrespects, shows, if this is a Chinese position said to me, it not only disrespects international law, throwing Unclos to the floor and trampling upon it, but it also disrespects the basic decency that should be accorded to our most gracious hosts, the Republic of Korea and the rest of the audience here,” suno kay Teodoro.
Diri na kag ginsal-ot niya nga kun may dapat man matun-an ang China, ini amo ang pagka-disente kag husto nga pamatasan. Nagpasalamat man si Teodoro sa mga nagpalakpak sa iya samtang ginasabat sini ang China. Gindugang man sini ang linya nga saulado sang mga Pilipino: ‘Mahiya naman kayo!’
Nahibaluan nga sa amo nga forum, naghatag sang speech si Teodoro sa first plenary session nga gintambungan sang international defense leaders kun sa diin ginduso sini ang collaborative security architecture sa Asya.#
