Nag-abot na ang Gilas Pilipinas sa Doha, Qatar para sa ikaapat kag katapusan nga window sang 2025 FIBA Asia Cup qualifiers.
Upod sa team sanday June Mar Fajardo, CJ Perez, Scottie Thompson, Calvin Oftana, Troy Rosario, Jamie Malonzo, AJ Edu, Dwight Ramos, Kevin Quiambao, Mason Amos, kag naturalized player Justine Brownlee.
Nagtabo man sa Qatar si Chris Newsome halin sa Chinese Taipei kag Carl Tamayo halin sa South Korea.
Atubangon sang Gilas sa friendly games ang national team sang host country sa Pebrero 14, Lebanon sa Pebrero 15, kag Egypt sa Pebrero 16.
Pagkatapos sang training camp sa Qatar, ang Gilas magabiyahe padulong sa Chinese Taipei sa Pebrero 20 kag sa New Zealand sa Pebrero 23 para sa katapusan nga bahin sang qualifiers.
Naka-qualify na ang Gilas para sa FIBA Asia Cup nga pagahiwaton sa Agosto sa Saudi Arabia, pero padayon gihapon sila nga magapanikasog sa qualifiers bangod makabulig ini sa pagpalig-on sang ila kapasidad bilang team.
Antes sila nagbiyahe padulong sa Qatar, naghanas na nga daan ang Gilas sa Inspire Sports Academy sa Laguna.
