Indi ma-verify sang Bureau of Immigration (BI) kun nakasulod na matuod sa Pilipinas ang mga miyembro sang International Criminal Court (ICC) nga amo ang maga-imbestigar sa war-on-drugs ni anay Presidente Rodrigo Duterte.
Suno kay Justice spokesperson Mico Clavano, wala sang kumpirmasyon ang immigration bureau sang ginpakig-angutan sang Department of Justice (DOJ) si Commissioner Norman Tansingco.
Apang gin-athag ni Clavano nga wala ini nagakahulugan nga gina-deny nila ukon ginakumpirma ang presensya sang ICC bangud posible man nga sala lamang ang naglutaw nga impormasyon.
Matandaan nga si anay presidential spokesperson Harry Roque ang una nagpahayag nga may nakahambal sa iya nga paguwa-sulod na sa Pilipinas ang pila ka mga personalidad halin sa ICC. Wala ginsapubliko kun sanday sin-o ang ginatumod nga sources ni Roque.
Sang Nobyembre 2023, matandaan nga nagpahayag si President Ferdinand Marcos, Jr. nga ginatun-an ang posible pagbalik sang Pilipinas sa ICC apisar pa nga may mga problema sa isyu sa hurisdiksyon.
Sa idalom sang drug war ni anay Presidente Duterte, 6,200 ka mga suspek ang napatay sa police operations base sa rekord sang gobyerno. Kun basehan naman ang rekord sang human rights group, yara sa 12,000 tubtub sa 30,000 ang nagkalamatay.#
