ILOILO CITY – Ginabanta nga masobra sa P100,000 ang halit nga gintuga sang sunog sa Bo. Obrero, Lapuz, Iloilo City sa diin duha ka balay ang totally damaged.
Ang tag-iya sang balay amo si Genoneva Neri apang ini ang gina-arkilahan ni Genoneva Dela Cruz samtang ang isa naman ka balay ang ginapanag-iyahan ni Lusifina Osano.
Sa interview sang Bombo Radyo kay FO3 Denmark Macoco, arson investigator sang Bureau of Fire Protection (BFP), iya ginpahayag nga mahimo kuryente ang ginhalinan sang sunog.
Padayon naman ang ginahimo nga imbestigasyon sang BFP agud mahibaluan ang rason sang pagkasunog.
Samtang suno naman kay Genoveva Dela Cruz, boarder sang balay nga nasunog, iya ginapahayag nga nakit-an sang iya anak nga may kalayo sa ika-duha nga panalgan sang boarding house.
Gilayon nga inpalong sang mag-asawa nga Dela Cruz ang kalayo apang nag-ibwal pa gid ini.
Emosyonal si Genoveva sa natabo sa ila sang iya pamilya ilabi pa nga mga panapton lamang ang ila nasalbar.
Nahibaluan nga mangin ang alkansiya sang iya nga anak ang naupos man kag nabilin lamang ang mga sinsilyo.
Ang natipon nga kwarta kuntani ang inug pa enroll pa sang anak ni Genoveva sa pagbukas sang klase.
