May posibilidad nga konektado sa ginapahayag 18-ex marines ukon mga anay bodyguards ni anay party-list lawmaker Zaldy Co ang gina-report nga pagpamahog sa seguridad sang Senado suno kay Senator Sherwin Gatchalian.
Suno kay Gatchalian, seryoso nila nga gina-atubang ang bisan ano nga pagpamahog kag ginmanduan na ang Office of the Senate Sergeant-at-Arms nga mag-coordinate sa mga intelligence agency agud mapamatud-an ang impormasyon.
Naka-heightened security naman ang Senado humalin Hunyo 9 matapos makabaton sang impormasyon halin sa National Bureau of Investigation (NBI) natuhoy sa posible nga pagpamahog.
Pahayag pa ni Gatchalian nga suno kay NBI Director Melvin Matibag, may posibilidad nga may armado nga grupo nga mahimo manggamo ukon mang-disturbo sa Senado, kag posible nga may koneksyon ini sa 18 ka anay Marines nga nalakip sa imbestigasyon may kaangtanan sa ginapahayag nga anomaliya sa mga flood control projects.
Bangud sini, ginpatuman sang Senado ang work-from-home arrangement para sa mga empleyado halin Hunyo 10 kag 11 kag temporaryo nga ginapahugot ang seguridad sa sulod kag palibot sang building.
Padayon nga nagakoordinar ang mga awtoridad sa mga law enforcement agency samtang ginabusisi ang lebel sang pagpamahog kag nagapatuman sang dugang nga mga tikang sa seguridad agud masiguro ang kaluwasan sang mga senador, empleyado, kag mga journalist sa Senado.
