Ginalantaw sang tag-iya sang balay nga amo ang ginpahayag ginhalinan sang sunog nga ang ginahampangan nga electric fan sang nabilin nga mga bata sa ila balay amo ang gintunaan sang sunog nga naglamon sang masobra 50 ka mga pamalay sa Zone 1, Barangay Old Airport, Mandurriao, Iloilo City.
Sa interview sang Bombo Radyo kay Lida Yudelmo, iya ginpahayag nga sang naghalin ini sa ila balay kahapon, nabilin ang tatlo niya ka mga apo.
Suno kay Yudelmo, nahiligan sang mga bata nga isaksak ang ila electric fan nga suno sa iya tuman na ka daan kag dali mag-init kun paandaron.
Posible suno sa iya nga nalipatan sang iya mga apo nga kakason ang nakasak-sak nga electric fan.
Nakibot na lang ini sang nagpauli nga nagakasunog na ang ikaduha nga panalgan sang ila balay.
Nagpasalamat nalang ini nga nakagwa kag safe ang iya mga apo.
Nagalain man ang buot sini nga wala na siya sang maubra bangud sa natabo nga aksidente kag naapektohan ang pila pa ka mga kaiping sini nga puloy-an.
