Magahimo sang maragtas ang World Athletics bilang labing-una nga international federation nga magahatag sang premyo nga kuwarta sa mga magadaog sa Olympic Games.
Suno sa federation, sa palaabuton nga Olympiada sa Paris nga natalana sa Hulyo 26-Agusto 11 subong nga tuig, makabaton ang 48 ka gold medalists sang tag-$50,000 ukon masobra P2.82-million.
Sa inisyal nga impormasyon, ang indibidwal nga mga atleta ang makabaton sang bilog nga kantidad, samtang tungaon naman ang premyo para sa mga myembro sang relay team.
Ang kabug-usan nga premyo nga $2.4 million ang pagakuhaon sa revenue share allocation sang International Olympic Committee nga ginabaton sang World Athletics sa kada apat ka tuig.
Iga-require man ang mga atleta nga magpaidalom sa standard anti-doping procedures agud makuha ang prize money.
Ini nga tikang sang World Athletics ang makabig nga maragtason bangud labing-una ini nga matabo sa sulod sang 128 ka tuig sang tradisyon sa Olympiada.
Ginpasalig man sang federation nga may ipain nga prize money para sa silver kag bronze medalists apang ipanagtag pa ini sa 2029 Olympics sa Los Angeles. #
